بقلم: ابو صراحة - 14-11-2011 | (صوت العراق) |
كنت راجع من بغداد وعلى الخطوط الاردنية عبرت شلون ما كان التفتيشات بطريق المطار وبعدين بالمطار الى ان وصلت للطيارة والف الحمد لله قعدت بالمقعد 14B المخصص لي حسب البوردينك كارت وبعد دقائق اجا شخص وبيده جنطة بالعراق نسميها دبلوماسية وقعد بصفي على 14 C وكنت مشغولا بالنظر الى خارج الطيارة ولم اسمعه يسلم علي إلى أن قال لي وبانكليزية ركيكة أنت مو عراقي ليش ما تجاوب على السلام ؟
استحيت منه وقلت أحسن شي خلي يعتقد آني أجنبي وما فهمته فرديت عليه بالانكليزية سوري .
سكت واخذ يشد حزامه ويرتب قعدته والشيء الذي جلب انتباهي هو عدد المحابس اللي كان بايديه بكل ايد خمس محابس وتذكرت الفتاح فال الشيخلي اللي كان يفتر بشوارع بغداد ويقرا أيادي الناس بعشرة فلوس وكان يلبس بايده اربع او خمس محابس .
بعد شوية سمعته يصيح المظيفة ويقول اني صايم وهذا اللي بصفي اجنبي كافر ويمكن يشرب مشروب اذا ممكن تشيليه منا وتوديه لغير مكان.
-المضيفة أستاذ آني ما اقدر أغير مكانه إذا تريد أنت تغير اكو مكان فارغ بالأخير.
صاحبنا زعل وقام يقوللها شلون توديني للأخير آني دبلوماسي وعراقي شوفي جوازي.
جاوبت البنية بكل احترام يا استاذ كل مسافر اله حقوقه عراقي مو عراقي ما دام دافع بطاقته.
صاحبنا : اي بس اني صائم وسيد ما ممكن اقعد بصف واحد يشرب.
المضيفة تركته وما جاوبته وبعدين اخونا التفت الي وقال بالانكليزية ارجوا ان تفهم باني مسلم وصائم حرام علي ان اقعد بصف واحد يشرب خمر .
قتله نعم اني افهم صارلي مدة اشتغل بالعراق ولا تخاف اني ما اشرب.
فرح جدا وبدا يردد الهم صلي على محمد وال محمد عدة مرات وبد ت الطيارة بالاقلاع ونام صاحبنا طول الطريق ووصلنا اخيرا عمان ونزلنا بمطار عالية ورحنا ناخذ جنطنا .
وشاء القدر ان اوقف خلفه بمكان وصول الجنط وهو ما يشوفني وبهالاثناء دق جرس تلفونه واخذ يتكلم باللهجة العراقية ويقول
نعم حبيبتي هسه وصلت عمان.
ما اسمع صوت اللي خابر
صاحبنا
لا تخافين دبرت كل شي قلتلهم شخص يكرهنا وكتب هالشي باسمج.
.
على كل حال المفتش نفسه يخاف مني ويعرف إذا أريد افصله بتلفون واحد فشلون يقدر يسوي شي ضدنا لا تخافين كل شي تمام.
حبي اني مشتاق لج حظري...........؟؟؟ هواي مشتاقلها خو ما عليج العادة
أوصل العصر عندج
لا الف مرة قتلج زوجتي ما تعرف وحتى لو تعرف اقول هاي بس تشتغل عندي .
قتلج كل شي انتهى بالوزارة رتبتها واقتنعوا .
زين حبيبتي جتي الجنط اخابرج من الاوتيل بعدين
سد التلفون وتقربت منه وقلتله وبالعربية سيدنا اشوف قبل شوي كنت صايم وما تقعد بصف واحد يشرب وهسه تحجي بالكاف والعين وجمالة ويا وحدة مو مرتك؟
-اصفر وجه وقال يا خوي العراقين كلهم عايشين بالكلاو ات وعلى الكلاوات خلينا نعيش.
لقفت جنطتي و اقول لو جنت كلاوجي هسه جنت ملحق بدولة اوربية.
ابو صراحة للمزيد تابع موقع عراق الاحرار